Растуды_его_дозор :)

Судъ Ярославль Володимеричь 87
Правда Русьская
1. Аже оубиеть мужъ мужа, то мьстити брату брата, любо отцю,
ли сыну, любо братучадо, ли братню сынови; аще ли не будеть кто
его мьстя, то положити за голову 80 гривенъ, аче будеть княжь
моужь или тиоуна княжа; аще ли будеть русинъ, или гридь, любо
купець, любо тивунъ боярескъ, любо мечникъ, любо изгои, ли
словенинъ, то 40 гривенъ положит и за нь.
2. По Ярославе же паки совкупившеся сынове его: Изяславъ,
Святославъ, Всеволодъ и мужи ихъ: Коснячько, Перенегъ, Никифоръ,
и отложиша оубиение за голову, но кунами ся выкупати; а ино все
якоже Ярославъ судилъ, такоже и сынове его оуставиша.

О оубиистве 88
3. Аже кто оубиеть княжа мужа в разбои, а головника не
ищють, то виревную (а) платити, въ чьеи же верви голова лежить то
80 гривенъ; паки ли людинъ, то 40 гривенъ.
4. Которая ли вервь начнеть платити дикую веру, колико летъ
заплатить ту виру, зане же безъ головника имъ платити. Будеть ли
головникъ ихъ въ верви, то зань к нимъ прикладываеть, того же
деля имъ помагати головникоу, любо си дикую веру; но сплати имъ
во обчи 40 гривенъ, а головничьство самому головнику; а въ
40 гривенъ ему заплатити ис дружины свою часть. Но оже будеть
оубилъ или въ сваде или в пиру явлено, то тако ему платити по
верви ныне, иже ся прикладывають вирою.

Оже станеть без вины на разбои 89
5. Будеть ли сталъ на разбои безъ всякоя свады, то за
разбоиника люди не платять, но выдадять и всего съ женою и с
детми на потокъ и на разграбление.
6. Аже кто не вложиться в дикую веру, тому людье не
помогають, но самъ платить.
7. А се покони вирнии были при Ярославе: вирнику взяти
7 ведеръ солоду на неделю, же овенъ, любо полоть, любо 2 ногате;
а в середу куна же сыръ, а в пятницю тако же; а куръ по двою ему
на день; а хлебовъ 7 на неделю; а пшена 7 оуборковъ, а гороху
7 оуборковъ, а соли 7 голважень; то то вирнику со отрокомь; а
кони 4, конемъ на ротъ сути овесъ; вирнику 8 гривенъ, а 10 кунъ
перекладная, а метелнику 12 векшии, а съсадная гривна.
8. Аже будеть вира во 80 гривенъ, то вирнику 16 гривенъ и 90
10 кунъ и 12 векши, а переди съсадная гривна, а за голову
3 гривны.

О княжи муже
9. Аже въ княжи отроци, или в конюсе, или в поваре, то
40 гривенъ.
10. А за тивунъ за огнищныи, и за конюшии, то 80 гривенъ.
11. А в сельскомь тивуне княже или в ратаинемь, то
12 гривенъ. А за рядовича 5 гривенъ. Тако же и за боярескъ.

О ремественице и о ремественице
12. А за ремественика и за ремественицю, то 12 гривенъ.
13. А за смердии холопъ 5 гривенъ, а за робу 6 гривенъ.
14. А за кормилця 12, тако же и за корми(ли)цю (а), хотя си
буди холопъ, хотя си роба.

О поклепней вире
15. Аще будеть на кого поклепная вира, то же будеть послухов
7, то ти выведуть виру; паки ли варягъ или кто инъ, тогда (а). А
по костехъ и по мертвеци не платить верви, аже имене не ведають,
ни знають его.

Аже свержеть вироу 91
16. А иже свержеть виру, то гривна кунъ сметная отроку; а
кто и клепалъ, а тому дати другую гривну; а от виры помечнаго
9 (а).
17. Искавше ли послуха, не налезуть, а истьця начнеть
головою клепати, то имъ (а) правду железо. Тако же и во всех
тяжахъ, в татбе и в поклепе; оже не будеть лиця, то тогда дати
ему железо из неволи до полугривны золота; аже ли мне то на воду,
оли то до дву гривенъ; аже мене, то роте ему ити по свое куны.
18. Аже кто оударить мечемь, не вынезъ его, или рукоятию, то
12 гривенъ продажи за обиду.
19. Аже ли вынезъ мечь, а не оутнеть, то гривна кунъ.
20. Аже кто кого оударить батогомь, любо чашею, любо рогомь,
любо тылеснию, то 12 гривенъ. Не терпя ли противу тому оударить
мечемь, то вины ему в томь нетуть.
21. Аче ли оутнеть руку и отпадеть рука или оусхнеть, или
(а) нога, или око, или не оутнеть (б), то полувирье 20 гривенъ, а
тому за векъ 10 гривенъ.
22. Аже перстъ оутнеть кии любо, 3 гривны продаже, а самомоу 92
гривна коунъ.

А придеть кровавъ моужь
23. Аже придеть кровавъ мужь на дворъ, или синь, то видока
ему не искати, но платити ему продажю 3 гривны; аще ли не будеть
на немь знамения, то привести ему видокъ слово противу слова; а
кто будеть почалъ, тому плати 60 кунъ; аче же и кровавъ придеть,
или будеть самъ почалъ, а вылезуть послуси, то то ему за платежь,
оже и били.
24. Аже оударить мечемь, а не оутнеть на смерть, то
3 гривны, а самому гривна, за рану же лечебное; потнеть ли на
смерть, а вира.
25. Аче попъхнеть мужь мужа любо к собе ли от собе, любо по
лицю оударить, ли жердью оударить, а видока два выведуть, то
3 гривны продажи; аже будеть варягъ или колбягъ, то полная видока
вывести и идета на ротоу.

О челяди
26. А челядинъ скрыеться, а закличють и на торгу, а за 3 дни
не выведуть его, а познаеть и третии день, то свои челядинъ
поняти, а оному платити 3 гривны продажи.

Аже кто всядеть на чюжь конь 93
27. Аже кто всядеть на чюжь конь, не прашавъ, то 3 гривны.
28. Аче кто конь погубить, или оружье, или портъ, а
заповесть на торгу, а после познаеть въ своем городе, свое ему
лицемь взяти, а за обиду платити ему 3 гривны.
29. Аже кто познаеть свое, что будеть погубилъ или оукрадено
оу него что и, или конь, или портъ, или скотина, то не рци и: се
мое, но поиди на сводъ, кде есть взялъ; сведитеся, кто будеть
виноватъ, на того татба снидеть, тогда онъ свое возметь, а что
погибло боудеть с нимь, то же ему начнеть платити.
30. Аще будеть коневыи тать, выдати князю на потокъ; паки ли
боудеть клетныи тать, то 3 гривны платити емоу.

О своде
31. Аже будеть во одиномь городе, то ити истьцю до конця
того свода; будеть ли сводъ по землямъ, то ити ему до третьяго
свода; а что будеть лице, то тому платити третьему кунами за
лице; а с лицемь ити до конця своду, а истьцю ждати прока; а кде
снидеть на конечняго, то тому все платити и продажю.

О татбе 94
32. Паки ли будеть что татебно купилъ в торгу, или конь, или
портъ, или скотину, то выведеть свободна мужа два или мытника;
аже начнеть не знати, оу кого купилъ, то ити по немь темъ
видокомъ на роту (а), а истьцю свое лице взяти; а что с нимь
погибло, а того ему желети, а оному желети своихъ кунъ, зане не
знаеть оу кого купивъ; познаеть ли на долзе оу кого то купилъ, то
свое куны возметь, и сему платити, что оу него будеть погибло, а
князю продажю.

Аже познаеть кто челядь
33. Аще познаеть кто челядинъ свои оукраденъ, а поиметь и,
то оному вести и по кунамъ до 3-го свода; пояти же челядина в
челядинъ место, а оному дати лице, ать идеть до конечняго свода,
а то есть не скотъ, нелзе рчи: оу кого есмь купилъ, но по языку
ити до конця; а кде будеть конечнии тать, то опять воротять
челядина, а свои поиметь, и проторъ тому же платити.
34. А князю продаже 12 гривенъ в челядине или оукрадше (а).

О своде же
35. А и своего города в чюжю землю свода нетуть, но тако же
вывести ему послухи, любо мытника, передъ кимь же купивше, то
истьцю лице взяти, а прока ему желети, что с нимь погибло, а
оному своих кунъ желети.

О татбе 95
36. Аже оубиють кого оу клети или оу которое татбы, то
оубиють во пса место; аже ли и додержать света, то вести на княжь
дворъ; оже ли оубиють и, а оуже боудуть людие связана видели, то
платити в томь 12 гривенъ.
37. Аже крадеть кто скотъ въ хлеве или клеть, то же будеть
одинъ, то платити ему 3 гривны и 30 кунъ; будеть ли их много,
всемъ по 3 гривны и по 30 кунъ платит.

О татбе же (а)
38. Аже крадеть скотъ на поли, или овце, или козы, ли
свиньи, 60 кунъ; будеть ли ихъ много, то всемъ по 60 кунъ.
39. Аже крадеть гумно или жито въ яме, то колико ихъ будеть
крало, то всемъ по 3 гривны и по 30 кунъ; а оу него же погибло,
то оже будеть лице, лице поиметь; а за лето возметь по
полугривне, паки ли лиця не будетъ.
40. А будеть былъ княжь конь, то платити за нь 3 гривны, а
за инехъ по 2 гривны.

А се оуроци скоту
41. Аже за кобылу 7 кунъ, а за волъ гривна, а за корову 40
кунъ, а за третьяку 30 кунъ, за лоньщину пол гривны, за теля
5 кунъ, а за свинью 5 кунъ, а за порося ногата, за овцю 5 кунъ,
за боранъ ногата, а за жеребець, аже не вседано на нь, гривна
кунъ, за жеребя 6 ногатъ, а за коровие молоко 6 ногатъ; то ти
оуроци смердомъ, оже платять князю продажю.

Аже будуть холопи татье, судъ княжь 96
42. Аже будуть холопи татие любо княжи, любо боярьстии, любо
чернечь, их же князь продажею не казнить, зане суть несвободни,
то двоиче платить ко истьцю за обидоу.

Оже кто скота (а) взищеть
43. Аже кто взищеть кунъ на друзе, а онъ ся начнеть
запирати, то оже на нь выведеть послуси, то ти поидуть на роту, а
онъ возметь свое куны; зане же не далъ ему кунъ за много летъ, то
платити ему за обиду 3 гривны.
44. Аже кто купець купцю дасть куплю в куны (а) или в
гостьбу, то купцю пред послухи кунъ не имати, послуси ему не
надобе, но ити ему самому роте, аже ся почнеть запирати.

О поклажаи
45. Аже кто поклажаи кладеть оу кого любо, то ту послуха
нетуть; но оже начнеть большимь клепати, тому ити роте оу кого то
лежалъ товаръ: а толко еси оу мене положилъ зане же ему въ
бологоделъ и хоронилъ товаръ того.

О резе 97
46. Аже кто даеть куны в резъ, или наставъ в медъ, или жито
во просопъ, то послухи ему ставити, како ся будеть рядилъ, тако
же ему имати.

О месячнемь резе
47. О месячныи резъ, оже за мало, то имати ему; заидуть ли
ся куны до того же года, то дадять ему куны въ треть, а месячныи
резъ погренути. Послуховъ ли не будеть, а будеть кунъ 3 гривны,
то ити ему про свое куны роте; будеть ли боле кунъ, то речи ему
тако: промиловался еси, оже еси не ставил послуховъ.

Оуставъ Володимерь Всеволодича
48. Володимерь Всеволодичь, по Святополце, созва дружину
свою на Берестовемь: Ратибора Киевьского тысячьского, Прокопью
Белогородьского тысячьского, Станислава Переяславьского
тысячьского, Нажира, Мирослава, Иванка Чюдиновича Олгова мужа, и
оуставили до третьяго реза, оже емлеть въ треть куны; аже кто
возметь два реза, то то ему исто; паки ли возметь три резы, то
иста ему не взяти.
49. Аже кто емлеть по 10 кунъ от лета на гривну, то того не 98
отметати.

Аже которыи купець истопиться
50. Аже которыи купець, кде любо шедъ съ чюжими кунами,
истопиться любо рать возметь, ли огнь, то не насилити ему, ни
продати его; но како начнеть от лета платити, тако же платить,
зане же пагуба от бога есть, а не виноватъ есть; аже ли
пропиеться или пробиеться, а в безумьи чюжь товаръ испортить, то
како любо темъ, чии то товаръ, ждуть ли ему, а своя имъ воля,
продадять ли, а своя имъ воля.

О долзе
51. Аже кто многимъ долженъ будеть, а пришедъ господь (а)
изъ иного города или чюжеземець, а не ведая запустить за нь
товаръ, а опять начнеть не дати гости кунъ, а первии должебити
начнуть ему запинати, не дадуче ему кунъ, то вести и на торгъ,
продати же и отдати же первое гостины коуны, а домашнимъ, что ся
останеть кунъ, тем же ся поделять; паки ли будуть княжи куны, то 99
княжи куны первое взяти, а прокъ в делъ; аже кто много реза
ималъ, не имати тому.

Аже закупъ бежить
52. Аже закупъ бежить от господы, то обель; идеть ли искатъ
кунъ, а явлено ходить, или ко князю или къ судиямъ бежить обиды
деля своего господина, то про то не робять его, но дати емоу
правдоу.

О закупе же
53. Аже оу господина ролеиныи закупъ, а погубить воискии
конь, то не платити ему; но еже далъ ему господинъ плугъ и
борону, от него же купу (а) емлеть, то то погубивше платити; аже
ли господинъ его отслеть на свое орудье, а погибнеть без него, то
того ему не платити.

О закупе ж 100
54. Аже изъ хлева выведуть, то закупу того не платити; но
оже погубить на поли, и въ дворъ не вженеть и не затворить, кде
ему господинъ велить, или орудья своя дея, а того погубить, то то
ему платити.
55. Аже господинъ переобидить закоупа, а оувидить купу его
или отарицю (а), то то ему все воротити, а за обиду платити ему
60 кунъ. Паки ли прииметь на немь кунъ, то опять ему воротити
куны, что будеть принялъ, а за обиду платити ему 3 гривны
продажи. Продасть ли господинъ закупа обель, то наимиту свобода
во всехъ кунахъ, а господину за обиду платити 12 гривенъ продаже.
Аже господинъ бьеть закупа про дело, то без вины есть; биеть ли
не смысля пьянъ, а без вины, то яко же въ свободнемь платежь,
такоже и в закупе.

О холопе 101
56. Аже холопъ обелныи выведеть конь чии любо, то платити за
нь 2 гривны.

О закупе
57. Аже закупъ выведеть что, то господинъ в немь; но оже кде
и налезуть, то преди заплатить господинъ его конь или что будеть
ино взялъ, ему холопъ обелныи; и паки ли господинъ не хотети
начнеть платити за нь, а продасть и, отдасть же переди или за
конь, или за волъ или за товаръ, что будеть чюжего взялъ, а прокъ
ему самому взяти собе.

А се аже холопъ оударить
58. А се аже холопъ оударить свободна мужа, а оубежить в
хоромъ, а господинъ его не выдасть, то платити за нь господину
12 гривенъ; а затемь аче и кде налезеть оудареныи тъ своего
истьця, кто его ударилъ, то Ярославъ был оуставилъ оубити и, но
сынове его по отци оуставиша на куны, любо бити и розвязавше,
любо ли взяти гривна кунъ за соромъ.

О послушьстве
59. А послушьства на холопа не складають, но оже не будеть
свободнаго, но по нужи сложити на боярьска тивуна, а на инехъ не
складывати. А в мале тяже по нужи възложити на закупа.

О бороде
60. А кто порветь бородоу, а въньметь знамение, а вылезуть
людие, то 12 гривенъ продаже; аже безъ людии, а в поклепе, то
нету пpoдaже.

О зубе 102
61. Аже выбьють зубъ, а кровь видять оу него во рте, а людье
вылезуть, то 12 гривенъ продаже, а за зубъ гривна.
62. Аже оукрадеть кто бобръ, то 12 гривенъ.
63. Аже будеть росечена земля или знамение, им же ловлено,
или сеть, то по верви искати татя ли платити продажю.

Аже кто борть разнаменаеть
64. Аже разнаменаеть борть, то 12 гривенъ.
65. Аже межю перетнеть бортьную, или ролеиную разореть, или
дворную тыномь перегородить межю, то 12 гривенъ продажи.
66. Аже дубъ подотнеть знаменьныи или межьныи, то 12 гривенъ
продаже.

А се наклади 103
67. А се наклады: 12 гривенъ, отроку 2 гривны и 20 кунъ, а
самому ехати со отрокомь на дву коню; сути же на ротъ овесъ, а
мясо дати овенъ любо полоть, а инемь кормомь, что има черево
возметь, писцю 10 кунъ, перекладнаго 5 кунъ, на мехъ две ногате.

А се о борти
68. Аже борть подътнеть, то 3 гривны продаже, а за дерево
пол гривны.
69. Аже пчелы выдереть, то 3 гривны продаже, а за медъ, аже
будеть пчелы не лажены, то 10 кунъ; будеть ли олекъ, то 5 кунъ.
70. Не будеть ли татя, то по следу женуть, аже не боудеть
следа ли к селу или к товару, а не отсочать от собе следа, ни
едуть на следъ или отбьются, то темь платати татбу и продажю; а
следъ гнати с чюжими людми, а с послухи; аже погубять следъ на
гостиньце на велице, а села не будеть, или на пусте, кде же не
будеть ни села, ни людии, то не платити ни продажи, ни татбы.

О смерде 104
71. Аже смердъ мучить смерда безъ княжа слова, то 3 гривны
продажи, а за муку гривна кунъ.
72. Аже огнищанина мучить, то 12 гривенъ продаже, а за муку
гривна.
73. Аже лодью оукрадеть, то 60 кунъ продаже, а лодию лицемь
воротити; а морьскую лодью 3 гривны, а за набоиную лодью
2 гривны, за челнъ 20 кунъ, а за стругъ гривна.

О перевесехъ
74. Аже кто подотнеть вервь в перевесе, то 3 гривны продажи,
а господину за вервь гривна кунъ.
75. Аже кто оукрадеть въ чьемь перевесе ястрябъ или соколъ,
то продаже 3 гривны, а господину гривна.
76. А за голубь 9 кунъ, а за куря 9 кунъ, а за оутовь
30 кунъ.
77. А за гусь 30 кунъ, а за лебедь 30 кунъ, а за жеравль
30 кунъ.
78. А въ сене и въ дровехъ 9 кунъ, а господину колико
боудеть возъ оукрадено, то имати ему за возъ по 2 ногате.

О гумне
79. Аже зажгуть гумно, то на потокъ, на грабежь домъ его,
переди пагубу исплатившю, а въ проце князю поточити и; тако же,
аже кто дворъ зажьжеть.
80. А кто пакощами конь порежеть или скотину, продаже 105
12 гривенъ, а пагубу господину оурокъ платити.
81. Ты тяже все судять послухи свободными, будеть ли послухъ
холопъ, то холопу на правду не вылазити; но оже хощеть истець,
или иметь и, а река тако: по сего речи емлю тя, но азъ емлю тя, а
не холопъ, и емети и на железо; аже обинити и, то емлеть на немь
свое; не обинить ли его, платити ему гривна за муку, зане по
холопьи речи ялъ и.
82. А железного платити 40 кунъ, а мечнику 5 кунъ, а пол
гривны детьскому; то ти железныи оурокъ, кто си в чемь емлеть.
Аже иметь на железо по свободныхъ людии речи, либо ли запа на нь
будеть, любо прохожение нощное, или кимь любо образомь аже не
ожьжеться, то про муки не платити ему, но одино железное, кто и
будеть ялъ.

О жене
83. Аже кто оубиеть жену, то темь же судомь судити, яко же и
мужа аже будеть виноватъ (а), то пол виры 20 гривенъ.
84. А в холопе и в робе виры нетуть; но оже будеть безъ вины
оубиенъ, то за холопъ оукоръ (а) платити или за робу, а князю
12 гривен продаже.

Аже оумреть смердъ 106
85. Аже смердъ оумреть, то задницю князю; аже будуть дщери
оу него дома, то даяти часть на не; аже будуть за мужемь, то не
даяти части имъ.

О заднице боярьстеи и о дружьнеи
86. Аже в боярехъ любо въ дружине, то за князя задниця не
идеть; но оже не будеть сыновъ, а дчери возмуть.
87. Аже кто оумирая разделить домъ свои детемъ, на том же
стояти; паки ли безъ ряду оумреть, то всемъ детемъ, а на самого
часть дати души.
88. Аже жена сядеть по мужи, то на ню часть дати; а что на
ню мужь възложить, тому же есть госпожа, а задниця еи мужня не
надобе. Будуть ли дети, то что первое жены, то то возмуть дети
матере своея; любо си на женоу будеть възложилъ, обаче матери
своеи возмуть.
89. Аже будеть сестра в домоу, то тои заднице не имати, но
отдадять ю за мужь братия, како си могуть.

А се закладаюче городъ
90. А се оуроци городнику: закладаюче городню, куну взяти, а
кончавше ногата; а за кормъ, и за вологу, и за мяса, и за рыбы
7 кунъ на неделю, 7 хлебовъ, 7 оуборковъ пшена, 7 луконъ овса на
4 кони: имати же ему, донеле городъ срубять, а солоду одину
дадять 10 луконъ.

О мостницехъ 107
91. А се мостнику оуроци: помостивше мостъ, взяти oт
10 локотъ по ногате; аже починить моста ветхаго, то колико
городне починить, то взяти ему по куне от городне; а мостнику
самому ехати со отрокомь на дву коню, 4 лукна овса на неделю, а
есть, что можеть.

А се о заднице
92. Аже будуть робьи дети оу мужа, то задници имъ не имати,
но свобода имъ смертию (а).
93. Аже будуть в дому дети мали, а не джи ся будуть сами
собою печаловати, а мати имъ поидеть за мужь, то кто имъ ближии
будеть, тому же дати на руце и с добыткомь и с домомь, донеле же
возмогуть; а товаръ дати перед людми; а что срезить товаромь темь
ли пригостить, то то ему собе, а истыи товаръ воротить имъ, а
прикупъ ему собе, зане кормилъ и печаловалъся ими; яже от челяди
плод или от скота, то то все поимати лицемь; что ли будеть
ростерялъ, то то все ему платити детемъ тем.
94. Аче же и отчимъ прииметь дети cъ задницею, то тако же
есть рядъ. А дворъ без дела отень всякъ меншему сынови.

О жене, аже ворчеться седети 108
95. Аже жена ворчеться седети по мужи, а ростеряеть добыток
и поидеть за мужь, то платити еи все детемъ. Не хотети ли начнуть
дети еи ни на дворе, а она начнеть всяко хотети и седети, то
творити всяко волю, а детемъ не дати воли; но что еи далъ мужь, с
тем же еи седети, или, свою часть вземше, седети же.
96. А матерня часть не надобе детемъ, но кому мати дасть,
тому же взяти; дасть ли всемъ, а вси розделять; безъ языка ли
оумреть, то оу кого будеть на дворе была и кто ю кормилъ, то тому
взяти.
97. Аже будуть двою мужю дети, а одиное матери, то онемъ
своего отця задниця, а онемъ своего. Будеть ли потерялъ своего
иночима что, a онехъ отця, а оумреть, то възворотить брату, на не
же и людье вылезуть, что будеть отець его истерялъ иночимля; а
что ему своего отця, то держить.
98. А матери которыи сынъ добръ, перваго ли, другаго ли,
тому же дасть свое; аче и вси сынове еи будуть лиси, а дчери
можеть дати, кто ю кормить.

А се оуроци судебнии
99. А се оуроц и судебнии: от виры 9 кунъ, а метелнику
9 векошь, а от бортное земли 30 кунъ, а о инехъ о всехъ тяжь,
кому помогуть, по 4 куны, а метелнику 6 векошь.

О заднице 109
100. Аже братья ростяжються передъ княземь о задницю,
которыи детьскии идеть их делитъ, то тому взяти гривна коунъ.

Оуроци ротнии
101. А се оуроци ротнии: от головы 30 кунъ, а отъ бортьное
земли 30 кунъ бес трии кунъ, тако же и отъ ролеиное земли, а от
свободы 9 кунъ.

О холопьстве
102. Холопьство обелное трое: оже кто хотя купить до полу
гривны, а послухи поставить, а ногату дасть перед самемъ
холопомь.
103. А второе холопьство: поиметь робу без ряду, поиметь ли
с рядомь, то како ся будеть рядилъ, на том же стоить.
104. А се третьее холопьство: тивуньство без ряду или
привяжеть ключь к собе без ряду, с рядомь ли, то како ся будеть
рядилъ, на том же стоить.
105. А въ даче (а) не холопъ, ни по хлебе роботять, ни по
придатъце; но оже не доходять года, то ворочати ему милость;
отходить ли, то не виноватъ есть.
106. Аже холопъ бежить, а заповесть господинъ, аже слышавъ 110
кто или зная и ведая, оже есть холопъ, а дасть ему хлеба или
оукажеть ему путь, то платити ему за холопъ 5 гривенъ, а за робу
6 гривенъ.
107. Аже кто переиметь чюжъ холопъ и дасть весть господину
его, то имати ему переемъ гривна; не оублюдеть ли, то платити ему
4 гривны, а пятая переемная ему; а будеть роба, то 5 гривенъ, а
шестая на переемъ отходить.
108. Аже кто своего холопа самъ досочиться въ чьемь любо
городe, а будеть посадникъ не ведалъ его, то, поведавше ему,
пояти же ему отрокъ от него и шедше оувязати и, и дати ему
вязебную 10 кунъ, а переима нетуть; аче оупустить и гоня, а собе
ему пагуба, а платить в то никто же, тем же и переима нетуть.
109. Аже кто не ведая чюжь холопъ оусрячеть и, или повесть 111
дееть, любо держить и оу собе, а идеть от него, то ити ему роте,
яко не ведалъ есмь, оже есть холопъ, а платежа в томь нетуть.
110. Аче же холопъ кде куны вложить (а), а онъ будеть не
ведая вдалъ, то господину выкупати али лишитися его; ведая ли
будеть далъ, а кунъ ему лишитися.
111. Аже пустить холопъ в торгъ, а одолжаеть, то выкупати
его господину и не лишитися его.
112. Аже кто кренеть чюжь холопъ не ведая, то первому
господину холопъ поняти, а оному куны имати роте ходивше, яко не
ведая есмь купилъ, ведая ли будет купилъ, то кунъ ему лиху быти
(а).
113. Аже холопъ бегая будеть добудеть товара, то господину
долгъ, господину же и товаръ, а не лишатися его.
114. Аже кто бежа, а поиметь суседне что или товаръ, то
господину платити за нь оурокъ, что будеть взялъ.
115. Аже холопъ крадеть кого любо, то господину выкупати и 112
любо выдати и, с кимь будеть кралъ, а жене и детемъ не надобе, но
оже будуть с нимь крали и хоронили, то всехъ выдати, паки ли а
выкупаеть господинъ; аже будуть свободнии с нимь крали или
хоронили, то князю въ продаже.